Xeografía dunha novela

O 16 de decembro, como todas e todos sabedes, presentouse no noso centro o libro de Xabier Quiroga, Izan o da saca. Os seus compañeiros e amigos Xosé Manuel García e Manuel Busto dedicáronlle este traballo:

Xeografía dunha novela from IES Laxeiro

Presenstación de "Zapatillas rotas"

Acto de presentación do libro de Xabier Quiroga, Zapatillas rotas, no IES Laxeiro de Lalín o xoves 16 de outubro de 2014:

A intervención de Xabier Quiroga non está completa porque rematou a cinta. Grazas a noso compañeiro Busto pola gravación.

Zapatillas rotas

A primeira colaboración deste blogue vén da man da nosa alumna de 2º de Bacharelato Alba Tomé. A súa lectura non é outra que Zapatillas rotas de Xabier Quiroga, profe deste centro.
En realidade, Alba prestouse para facer a presentación do libro no acto que se realizou onte no noso Salón de Actos.
Así que, dobremente, grazas Alba!

Xaquín é un ancián que está a pasar os seus últimos anos nunha residencia. Un bo día,desaparece da man dun parado e xuntos emprenden unha viaxe cara ao mar.  A súa procura, rapidamente, comeza a desencadear unha serie de inesperados sucesos e enredos. Paralelamente, o señor Xaquín recuperará na súa viaxe unha historia que parecía agochada no máis fondo dos seus mellores recordos. Por suposto, e coma non podía ser doutro xeito, trátase dunha historia de amor. Todo isto, conduciranos a un sorprendente desenlace onde se porán de manifesto a avaricia, a manipulación e as mentiras. Así, a novela remata, tal e como describe o autor, nun deses momentos nos que a vida, coma nunha película, debería, e non dá, empezar de novo ou non ser verdade.

Zapatillas rotas é a quinta novela de Xabier Quiroga. Coma en moitas das anteriores, abórdase un tema moi destacado: a Guerra Civil. Desta volta tratarase este tema da man do señor Xaquín, que nos trasladará á época franquista a través dos seus recordos. Unido a isto, tamén se pode ver como influíu a represión na actualidade e, especialmente, na xente daquela época. Finalmente, Zapatillas rotas comparte co resto da súa obra a ambientación na paisaxe galega, compartindo incluso lugares comúns coma a braña de Bouzuás.

Por outra banda, esta novela ten unha forte carga de denuncia: primeiramente, aos medios de comunicación. Ao tratarse dun secuestro, estes xogan un papel fundamental ao longo de toda a trama. Na obra, os xornais e a televisión manipulan a información, terxiversan a realidade ou cometen constantes erros no relato dos sucesos. Todo isto non está lonxe da realidade: no día a día todos podemos observar como a mesma noticia pode adoptar distintos titulares segundo os xornais, como se selecciona a información e, por suposto, como se manipula para favorecer ou prexudicar aos involucrados. En segundo lugar, tamén se fai unha crítica moi forte á actual situación do noso país: a crise. Un dos protagonistas principais é un parado e nel maniféstase o peor do ser humano en tempos de crise: a falla de escrúpulos, a xenreira e a avaricia. Pode que pareza unha esaxeración, pero se o pensamos en frío, convivimos con isto todos os días: a mala situación económica que estamos a atravesar deriva en crimes, roubos e continua falla de caridade… Algo que se reflicte páxina a páxina nesta obra. Finalmente, Zapatillas rotas tamén mostra a actual situación de diglosia na que nos atopamos: Vanesa, a rapaza máis nova, exprésase en castelán, tal e como foi educada. Isto non é máis ca unha proba de como a xente nova, cada día, se expresa menos na nosa lingua, deixándoa nun segundo plano. Nese sentido é moi importante a creación de obras literarias, coma esta. Nós, os adolescentes, somos os que debemos loitar pola conservación da nosa lingua e, por iso, é moi importante que teñamos contacto con obras coma Zapatillas rotas, que fan un importante labor de recuperación do noso idioma e fomentan o seu emprego.

Sorrisos, enfados, gargalladas, amor, bágoas, intriga, decepción… Zapatillas rotas comprende, na súa totalidade, unha gran mestura de sentimentos. Persoalmente, eu sentinme moi vinculada coa historia: o feito de que o espazo e o tempo sexa o noso presente, e a variedade de idades entre os personaxes fai que conectes moi rápido ca trama.  Ademais, esta sucede coma a vida mesma: en medio dun misterioso crime atopámonos con pequenas doses de humor, de sarcasmo, de emocións, de suspense… convertendo así a obra nunha historia moito máis humana e próxima. 

Por todo isto, gustaríame pedirvos que empregarades un anaco do voso tempo en ler a historia enfrascada entre as páxinas de Zapatillas rotas

O autor acompaña ao lector: Xabier Quiroga

Este traballo da biblioteca será proxectado esta tarde na presentación do libro do noso compañeiro Xabier Quiroga, Zapatillas rotas:

A artista, a nosa prezada MAR.

Xabier Quiroga presenta as súas "Zapatillas rotas"

Hoxe estamos de celebración no noso centro. E é que o noso compañeiro de Galego, Xabier Quiroga, presenta no noso Salón de Actos a que de momento é a súa última novela: Zapatillas rotas. A biblioteca participa activamente na presentación da mesma.