O alumno de 2º de Bacharelao, Xabier García Andrade, mándanos unha pequena crónica do que supuxo a visita de Ángel Carracedo.
O pasado venres, día 2 de outubro, tivemos a honra de
escoitar ao que máis proxección internacional posúe dos investigadores galegos,
Ángel Carracedo. A día de hoxe aínda seguimos asimilando a complexidade e a
extensión do seu traballo. Cómpre realizar un acto de fe para entender coma
unha soa persoa acadou tanto éxito e mantén unha humildade tan característica.
Dun xeito próximo e abordable para todos os presentes, o
médico de Santa Comba presentou cuestións relacionadas maioritariamente coa
xenética. Comezou definindo elementos básicos coma poden ser o código xenético
ou o ADN (indicando tamén a súa estrutura). Enfatizou especialmente a importancia
do método de secuenciación do ADN desenvolto por Frederick Sanger, que permite determinar
a orde dos nucleótidos que forman un xene. Este descubrimento facilitou o
progreso do Proxecto Xenoma Humano.
Rematando esta introdución divulgativa sobre esta área da
bioloxía, decidiu contarnos grosso modo en que consistía o seu traballo en
medicina forense, campo que resulta moi atractivo para o público. Contou como
resolve problemas de filiación decote, engadindo algunhas anécdotas
inverosímiles. Ademais, tamén participou en casos tan coñecidos coma o caso Bretón
ou o Alcasser, contribuíndo á xustiza. Coa tecnoloxía actual pódese determinar
cunha mostra de ADN o grupo étnico ao que pertence unha persoa, o que supón un
avance no trazado de retratos robot.
Todos os que asistimos podemos asegurar que Ángel Carracedo
conseguiu captar toda a nosa atención e que gozaramos coa ciencia e as súas
aplicacións. Por outra parte, aínda cobra máis valor o exemplo que inculca
alguén que goza de tanto prestixio e mantén a súa modestia.
Ningún comentario:
Publicar un comentario