O alumnado “tuneou”
un catálogo de Nadal para denunciar os estereotipos de xénero no marco do
proxecto Escolas sen Racismo de Agareso e ACPP
20 de decembro
de 2016.- O obradoiro
de comunicación de guerrilla impulsado pola ONGD Asemblea de Cooperación pola
Paz (ACPP) e a Asociación Galega de Reporteiros
Solidarios (Agareso) no IES Laxeiro
clausurouse esta mañá cunha acción na que o alumnado “tuneou” unha revista de
xoguetes para promover os agasallos responsables e non sexistas. Esta
actividade de educación e comunicación para o desenvolvemento encádrase no
movemento europeo Escolas sen Racismo, que engloba a máis de 500 centros
educativos, e clausurouse coincidindo co
Día internacional da solidariedade humana.
Empregando a técnica do “collage”, estudantes
de 3º da ESO crearon o seu propio catálogo para denunciar os estereotipos de
xénero, pero tamén os xogos violentos, a marxinación do galego ou o consumismo,
xa que estas publicacións publicitarias mesmo se reparten ás portas dos centros
educativos. Logo desprazáronse polo patio presentándolle
o resultado ás demais compañeiras e compañeiros, cuxos comentarios foron
recollidos en vídeo.
Previamente, o alumnado achegouse a través
dalgúns exemplos á guerrilla da comunicación, que pretende poñer en cuestión fórmulas de dominio derivadas do patriarcado, o
capitalismo, a supremacía racial, etc. a través de chamativos métodos, como a
linguaxe da publicidade ou a ocupación do espazo público. A clave está en
alterar os códigos habituais da comunicación de xeito divertido e buscando a
reacción interactiva do público a prol da causa.
As rapazas e rapaces decidiron en conxunto a
temática a traballar, pois trátase de empoderalos para lanzaren as súas propias
mensaxes e fomentar así a participación no cambio cara unha sociedade máis
xusta e igualitaria. Contribúese, deste xeito, a formar unha cidadanía con espírito crítico e
construtivo. Este é obxectivo do proxecto ‘Escolas sen racismo, escolas para a
paz e o desenvolvemento’, cofinanciado pola Xunta de Galicia, que este ano se
desenvolve en oito centros de ensino con actividades coma exposicións,
teatrofórum ou contos ilustrados para traballar contra os prexuízos e a
discriminación. Os obradoiros educomunicativos de radio e televisión pódense seguir no blog www.agareso.org/esr.
+info: Carmen Novas
Tel. 616 145 077 escolasenracismo@agareso.org
Ningún comentario:
Publicar un comentario